Tadau Komuhakan Sabah ko-5: Komuhakan doiti, kogompitan, touvi di Eklizia

PENAMPANG – “Izou no ii suupu di Tuhan, adadi no doid dogo miaga dii noboos nu.”

Nibuvan komuhakan id pototongkop di Archdiosis Kota Kinabalu om Diosis Keningau om Sandakan mamanau dumaapas do Sabah, umampai do papataak dioho sondii doid di Tuhan, do guminavo Disido om sumuupu Disido.

Tuhukon dioho ii batos dioho do id dii Tadau Komuhakan Sabah, ko-5 (SYD-5), tinompuan diho Archdiosis KK, do doiho id Holy Rosary Limbahau om St Joseph Papar, 25-31 July diti.

Iho ‘kalamazan komuhakan’ nopo nga insan daasom apat toun, pinoguhuanan iho dii ponompogunan dii Salip SYD-5, tinanud dii tinuhun-tuhun di Mary, mantad paroki kumaa doid paroki poduduapus do Sabah, pinotimpuun ontok dii 24 Feb 2019 id Holy Trinity Tawau. Paroki Holy Trinity o minonompuan dii SYD-4.

Ponompogunan diho Salip SYD nopo nga nakadaapas do Diosis Sandakan om Keningau om nokodimpot doid Archdiosis KK. Nokopopounsikou kozo iho diho komuhakan ngaavi, minanakadai kozo dioho o paganakan dioho, tuhun ngaavi paroki om faado ngaavi diho paroki ngaavi.

Iho SYD-5 nopo nga poposoou doid tuhun tongomuhok, suminusuut dii Vuhan Extraordinary Mission, id October 2019, noopusan di kavavagu, pinamahaavan di Pope Francis do mogimvagu do kaampazan doid ‘missionary’ dotokou, do papabaagi dii Abal Tavasi di Jesus Kristus doid saviavi tuhun.

Manaaki ho do kounsuban do montok monontuduk dioho do momusoou-taahom-ahom do lati do dumadi do ‘missionary. Id poo’ompus diho ponompogunan, nokopinsingiho izioho do dumadi dii voos di Kristus tu nohoou izioho do popointahang dii voos di Kristus. I Kristus i ii voos tobingginavo di Kinoingan, ingkaa no do i pomogunan mositi dumuumak dii kotindapaan di Kinoingan id dioho.

Minomihi iho SYD-5 dii boos di Mary, sabaagi do ‘tema’ dioho; hizab diho komuhakan ngaavi diho SYD-5 nopo nga do maganu di Mary, ii mokiki’ia koiso om totopot di Kristus, sabaagi do poomitanan tagazo kozo dioho do montok di Eklizia poimuhok.

SYD lahan magangat di Jesus do umampai

Suvai ko ii kounsikaan om kaandasan piandad-andad kozo, ii oovit diho komuhakan ngaavi, mositi nogi do asaga izioho do ia’on di Jesus ii “mongia, do okonko mantad tosodu toi dahabus, nga mantad suang do minuhok nu no kozo, komuhakan ii poboogizon Disido miampai diau”. (Kristus Vivit, 9).

“Tuhun tongomuhok kaanu popotihombus di Eklizia di Kristus do poimuhok. Kaanu izioho do popotood dosido do mantad mimang buntung; kaanu izioho do popotihombus dosido do muzu, manahob dosido do mantad sumumbung om monongko-daa-dau, manakadai dosido do dumadi do asampit om do papasasi do kosasian hobi vinasi, manampung dii tongosiisian om zaazadaan, monongkiimang montok kotuhidan om do ohuduk do popotumbozo dosido do hoovon doid pinsingkinaman.” (Kristus Vivit, 11).

Iho tuhun tongomuhok mositi koiho do iho SYD nopo nga iso dii lahan togumu, ii vazaan di Jesus do magangat do “dumadi do missionary taiso-koosi id toombo tokou noopo om di nunu noopo o kopikouvangan o’ium dotokou id dotokou sondii: id sungkad tukad ngaavi dotokou, id sikul, id sipoot toi koposion sosiol, id minsoosondii monompuan toi id pakalajaan. Id nombo nopo tokou, tomoimo kivaa kosivatan dotokou do papabaagi dii Abal-tavasi. Iho no ii ingkuo i Tuhan do humabus tumuka do tosoosonguhun. Guminavo Isido diozu, oi tuhun tongomuhok koginavaan, tu iziozu no ii pavazaan ii popotongkop do ninavau om kahansanan Disido. Humansan Isido do katamaan diozu, vinakas ginavo diozu om kapaagatan diozu.” (CV, 95) – CS